Sharaxii Heestii geediga hayaan kuba…“Qalin Maal Cabdinaasir Axmed ibraahim”

0

“Qalin Maal Cabdinaasir Axmed ibraahim”

Heestan “geediga hayaan kuba….”eraydeeda waxaa leh, abwaan Xasan Xaaji Cabdilaahi “X.Ganay,”waxaa ku luuqeeya Khadra Daahir CIge iyo Axmed Cali Cigaal.Haasaawe qurux badan oo murti sogordohon iskugu hal-celiyay. Ka hor inta aynaan u garqaadin, bal aan sharax guud ka horreysiino. Murtida sarbeeban ee Khadri ku ibbo furtay, sharaxeeda guud ee dhaqan ahaan. Noloshii macaanka badnayd, noloshii qiimaha lahayd, noloshii luulka ahayd, noloshii dad keedu qiimahaa, noloshii gacmteena ku jirtay, noloshii xalka khilaafkeeda sida loo maareeyo aan aqoonta iyo xeerka ka lahayn, noloshii aan ka soo hangagaarnay ee miyiga.

Reerku markuu guurayo, saacaddu markay ku simantahay Jid  oo ah wixii ka danbeeya, 1:00 pm. ayuu odayga reerku caroogga afuufi jiray. Si dhammaan la tooso, dumarkuna wixii hawl ay leeyihiin ayay reer ka qaban jireen, ragguna sidoo kale. Marka aqalka la furfuro ee awrka gurgurshaaga ah lagu raro agabka, carruurta iyo dadka da’da ah, ee socod gabtay waa loo “guray jiray,” oo awrka dushiisha ayaa makhsinyar looga dhisi jiray. Sidaa ayuu reerku geediga ku gali jiray. ilaa intuu ka gaadhayo meeshii loo soo sahamiyay. Sida ay qiyaasayaan ragga reerku waa in geedigu gaadho halkuu u socday, ku sinaan shanta galabnimo. si dhismaha aqalka iyo oodda xarooyinka looga gaadhsiiyo, ka hor intaanu gabalku dhacin.Haddii ay suuro gali waydayo. Dariiqa kaliya ee bannaan waxa weeyaan in la helo ”Guri-cas” oo ah meel reer hore ka guuray, oo laga heli karo, xerooyin xoolaha bahalka lagaga xareeyo. Sawirka farshaxannimada dheeri ku dheehan tahay waxa weeyaan, reerka oo geedi ah, gabalkiina u dhacay, meel reer hore ka guurayna waayay, baahida uu u qabo “Ood” waa mid intee leeg?! Si kasta oo ay u weyn tahay baaxadda baahida reerkaasi u qabo ood. Haddana waxaa jirtay dhir aan la jarin. sida dad ku ba u leeyahay (barri ma gaydo) ayay dhirtuna u leedahay mid aan gudinta loo quudhin, baahi kasta oo loo qabo.                                                                                                                                                            

 Geediga hayaankuba,                                                                                                                                                              

Goor gaaban adigoo,                                                                                                                                                 

Guri waayay laga baxay iyo,                                                                                                                                                       

Ood aad gurataba,                                                                                                                                               

Gabalkiina kuu dhacay,                                                                                                                                                   

Dhirta ba geed aan la jarin iyo,                                                                                                                                          

Ogow lama garaacaan,                                                                                                                                        

Go’I waayay inuu jiro,

Intaa kuma dhaafin’ e waxay Khadri ku dartay, in ay iyaduna sidoo kale, barri ma gaydo tahay,  oo ay mudnaanteeda leedahay, intaana ay u dheertahay, -in ay gayaan yihiin -in ay jeceshahay iyo -in ay gacaltooyo ka dhaxayso.waxaanay ka codsatay inuu gacan walaalnimo ka siiyo codsigeeda ku salaysan rabitaanka kalgacal. Waana kuwan erayda ay ku sharaxday,

Gar allee dad kuna qaar,                                                                                                                                            

Waa sida geddaasoo,                                                                                                                                               

Mar haddaynu nahay gacal,                                                                                                                                               

Anna ahay gayaankaa,                                                                                                                                                 

Gaar ahaanna caashaqu,                                                                                                                                         

Guud kaaga igu helay,                                                                                                                                           

Gocoshada xasuusoo,                                                                                                                                                           

 I si gacan walaalnimo.

Meerisyadii quruxda badanaa ee khadra ku baantay, ama ku garnaqsatay. Tuducii hore,inagoo u soo noqon doona tuducyada danbe, bal aan eegno wuxuu isku dufaacayo Axmed Cali Cigaal. Khadra Daahir sidaynu arkaynay waxay hor dhigtay Axmed Cali Cigaal hadal aanu si fudud uga hal-celin Karin, yeelkeede arin wax ay hortaalaa Axmed Cali Cigaal muxuu odhan, halkuu’se ka bixi bal aynu eegno

Waxa uu u eertay in uu is dhega mariyo hadalka dawga ah ee Khadra Daahir’na dhagaha ka furaysto waxaanu isku masaalay sida dhul ay isku daba mareen gudgude aan hilaaciisii gabin, gu’ haggaagay, dirrir iyo darruuro aan yarayn oo mar qudh ah maragga furtay, aakhirkiina dhulka wadhay xareed ku dul goglan oo dul gawdiida oogada dhulka hasa yeeshee waxa uu Axmed Cali Cigaal ku gaba-gabeeyay in aan biyahaasi dhulka badhkii oo gawaan ah aanay galin isna (Axmed Cali Cigaal) ahaan la mid yahay isla markaana  warkeedu aanu isaga ka dhaadhacayn.

“Gudgudaha hilaacuba,                                                                                                                                                 

Gu’ barwaaqo oo da’ay,                                                                                                                                         

Godlan yiin darruuru,                                                                                                                                                 

Iyo dirrir aan gaagixin,                                                                                                                                          

Godlan tahay xareeduna,                                                                                                                                

Dhulkaba meel gawaannoo,                                                                                                                                

Ogow geedo soo bixin,                                                                                                                                             

Gu’i waay’e inuu jiro,                                                                                                                                                

Gar allee dad kuna qaar,                                                                                                                                        

Waa sida geddaasi’e,                                                                                                                                                  

Gasariir ha noqonine.      

Axmed Cali Cigaal isaga oo go’aan siinaya khadra isla markaana toos u ambabixinaya waxa uu odhanayaa, in aynu gacal nahay, iyo in aad gayaan kay tahay, labadaba gartay, balse inan yahay is guursan maynee nabad gal.

 “Mar in aynu nahay gacal,                                                                                                                                  

Marna tahay gayaankay,                                                                                                                                  

Labadaaba garansani,                                                                                                                                                 

Ku’se guursan maayee,                                                                                                                                             

 Taasaad niyadda galin,”

Mar labaad ayay khadri dooddii halkii ka sii wadataa, iyadoo keentay halxidhaale kii hore ka mug weyn, maadaama aanu wali tixgalin codsigeeda. Waxay dareentay in hogo-tuskii hore aanu deeqin. Loo na baahan yahay in mar labaad si kale loo dhigo, waxay haddana si sarbeeban oo sidii hore aad uga qurux badan u soo dhigtay.ka hor intaynaan bilicdasan meerisyada luulka ah ee hoos ku xardhan bal sharax tiraabeed aan ka horaysiino. Dhaqan ahaan Soomaali martida xil weyn ayay iska saari jirtay, sooryaynteeda iyo soo dhawaynteeda ammaan iyo sharaf baa laga dhaxli jiray. Halka fogaynteedana magac xumo iyo  ku sifow dhabcaalnimo laga dheefi jiray.Khadri waxay ku baanaysaa, haddii marti kugu soo hayato waliba marti goor xun socata, martidan oo kugu soo beegantay gurigaaga oo madhan, wax la cuno na adigoon hayn. Guunyada la dhaqdo ha ba ugu yaraato adhi’e, adigoon hayn. Intaana ay kuu sii dheer tahay geela oo kaa gudhan, oo martidan goorta xun kuu timid aad u listo. Oo ku darso oo martida lafteeda ayaa kala sharaf weyn’e waxaa jirta mid aan la qadin karin oo haddii ay kugu qabsato “Awrka” reerku kuguuro loo qalo, intaas oo hogo-tus ah markay khadri marisay waxay ku baantay in ay “qiimaha martidaa aan soo sharaxnay oo kale leedahay.” Hoos ka dhowr meerisyadii Tixda ahaa ee khadri ku gorgortantay:-

Marti goor xun socotaba,                                                                                                                               

 Gurigaaga oo  madhan,                                                                                                                                       

Adigoon gasiin hayn,                                                                                                                                                    

Iyo gaabanow adhi,                                                                                                                                               

Geelluna irmaannayn,                                                                                                                                                               

Dad kaba gobal aan la qadin iyo,                                                                                                                  

ogow gibil ma dadaashaha,                                                                                                                               

Loo gawracaa jira,                                                                                                                                                        

Ha gafine u jeedudu,                                                                                                                                                 

Waa sida geddaydoo,                                                                                                                                                 

Mar haddaynu nahay gacal,                                                                                                                                    

Anna ahay gayaankaa,                                                                                                                                                 

Gaar ahaanna caashaqu,                                                                                                                                      

Guudkaaga ugu igu furay,                                                                                                                                        

Gocoshada xasuusoo                                                                                                                                                                 

I sii gacan walaalnimo.

Comments

comments

Leave a Reply

This site uses Akismet to reduce spam. Learn how your comment data is processed.