Nuxurka Xogo Ku Saabsan Markabka Hubka Sida Ee Wali Berbera Ku Xayiran iyo Mawqifka Xisbiga Ucid

0

Hargeysa(Sayruuq)-Guddida Qaramada midoobay u qaabilsan Dabagalka Cunaqabataynta Hubka ee saaran Somalia iyo Eritria, ayaa la sheegay inay bookhdeen Markabka Hubka sida ee somaliland ku qabatay Dekedda Berbera Todobaadkii hore.

Ma jiro war rasmi ah oo ka soo baxay imaatinka Berbera ee Guddida Qaramada midoobay, balse xogo uu socdaalkooda ka helay Wargeyska Jamhuuriya ayaa tilmaamaya in Guddida oo uu weheliyo Taliyaha Ciidanka ilaalada Xeebaha Somaliland fuuleen markabka islamarkaana guddidu indho-indhaysay hubka Markabka saaran.Guddida oo salaasaddii markabka bookhatay ayaa Masuuliyiinta ka qortay warbixin ku saabsan arrimaha markabkan.

Dhinaca kale wasiirka daakhiliga oo wakhti uu shalay shir jaraa’id kaga hadlayay Arrimaha amaanka Magaalooyinka wariyeyaashu waydiiiyeen hawlaha Markabku waxa uu si kooban u sheegay in wali Markabku xidhan yahay,islamarkaana laga dejin doono hubka dibna aan loo saari doonin.

Wasiir Warancadde ma sheegin inay jirto cid leh Hubka Markabka saarnaa oo la soo xidhiidhay balse xogo kale ayaa tilmaamaya in Dawladda Suudaan la soo xidhiidhay Xukumadda islamarkaana ku wargalisay inay Hubkaasi leedahay islamarkaana lagu waday Carwo dhanka hubka ah oo 22 ilaa 26-ka bishan ka dhacaysa Dubai.

Markabkan oo sida Hub ay ka mid yihiin Beebeeyo,Baabuurta qafilan ee ciidanka,Gaadiid aan xabbaddu karin,dooni kuwa dagaalka ah iyo noocyo kale ayaa si weyn Somaliland looga hadal hayaa,sidoo kalena warbaahinta Somaliland iyo warbaahinta Dubai iyo Yemen aad wax ugu qoreen arrimaha Markabkan.

Dhinaca kale Musharax xigeenka Xisbiga Ucid Cabdirashiid Xasan Mataan, ayaa sheegay inay haboon tahay in Xukumaddu mawqif cad ka qaadato arrinta Hubkan “Waad ogtihiin maalmihii u dambeeyay in laga hadlayay Markab siday hub oo Berbera ku soo xidhay. Illaa iyo hadda wax Go’aan ah oo cad iyo wax warbixin ah oo laga bixiyayna ma jirto oo dhanka Xukumadda ah.Dastuurkeenu wax buu qorayaa, Innagoo ku jira Cuno qabatayn dhanka hubka ah, in Hub aynaan war u hayn ka soo dego Dekedda waa inagu ceeb, marka xiga waxaynu nahay Qaran,Dastuurkeenu waxbuu qorayaa maaha in laga war-wareego, waa in arrinka sidiisa loo fuliyaa,waa inaanay danno gaar ahi soo galin go’aankii laga qaadan lahaa ee Sharciga ahaa.” Ayuu yidhi Musharax xigeenka Ucid oo Hargeysa warbaahinta Maanta kula hadlay

Comments

comments

Leave a Reply

This site uses Akismet to reduce spam. Learn how your comment data is processed.