Jawiga Ciyaaraha Gobolladu Ku Furmayaan Iyo Dabuubta Wasiirka Ciyaaraha

0

Burco (Sayruuq): Tartanka ciyaaraha gobollada Somaliland ayaa maanta gelinka dambe si rasmi ah uga kala furmaya magaalooyinka Boorame iyo Burco, iyadoo la qorsheeyay in wareegyadda hore ay todoba gobol ku ciyaaraan magaaladda Burco, 7 kalena magaaladda Boorame.Waxaanay afarta gobol ee isugu soo baxaa wareega afaraad ay ciyaarahoodda ku yeelan doonaan caasimadda Hargeysa.

Tartanka ciyaaraha oo ay sannadkan waxaa ka qayb gelaya 14-ka gobol. Tartankan ciyaaraha goboladda Somaliland ee maanta gelinka dambe ka bilaabmaya magaaladda Boorama waxaa furi doona Wasiir ku xigeenka wasaaradda ciyaaraha Yuusuf Cismaan Garas. Halka kuwa ka dhacaya Burco uu furi doono Wasiirka wasaaradda ciyaaraha Axmed Cabdi Kaahin.

Boorama waxaa ku wada ciyaari doona xulalka gobollada Selel, Gabiley, Awdal, Buuhoodle, Maroodi Jeex, Saaxil iyo Hawd. Sidoo kale tartanka Burco ka dhacaya waxaa ku wada ciyaari doona todobadda gobol ee kala ah, Daad-madheedh, Saraar, Sanaag, Xaysimo, Sool, Badhan iyo Tog-dheer.

Wasiirka wasaaradda ciyaaraha Axmed Cabdi Kaahin, oo xalay khadka telefoonka ugu waramay DAWAN, isagoo ku sugan magaaladda Burco, waxa uu sheegay in hawluhu ay si fiican u socdaan, isla markaana ay maanta gelinka dambe isku mar ciyaaruhu si rasmi ah uga bilaabmayaan magaalooyinka Burco iyo Boorame.

Wasiirku wuxuu tilmaamay in sannadkan ay tartanka ciyaaraha goboladda Somaliland ka qayb qaadanayaan 14-gobol, iyadoo tartankani iskugu jiro Kubadda Cagta, kubadda Kolayga, Orodka iyo noocyadda ciyaaraha fudud.

Wasiir Kaahin, waxa uu sheegay in dhammaanba xulalka ka kala socda goboladda in ay wada gaadheen magaalooyinka ay ku kala ciyaarayaan. isagoo ka warbixinayay sida ay socoto qaban qaabadda iyo u diyaar garowga furitaanka ciyaaraha waxa uu yidhi “Way soo wadda gaadheen kooxuhu Burco, oo imika aan aniguba joogo, Booramana way ku sii qul-qulayaan, qaarna way gaadheenba. si fiican ayay hawluhu u socdaan.”

Waa markii u horaysay ee tartankan ciyaaraha goboladda Somaliland ay laba gobol ka kala furmaan, waxaanay sidoo kale noqonaysaa markii koowaad ee ay goboladii ugu badnaa ka qayb qaataan ciyaaraha.

Wasiirka oo aanu waydiinay in qorshahaasi uu culays dhaqaale iyo mid maamulba ku soo kordhin karro wasaaradda, iyo sida ay uga diyaar garoobeen dhinaca maamulka gar-sooreyaasha iyo shuruucda ciyaaraha. waxa uu ku jawaabay “Arrintaasi waa mid looga dan leeyahay in gobollada lagu qabanayo iyo gobolada wada ciyaaraya ay tageereyaashu yimaadaan, oo dad kale ay yimaadaan, si dhaqaale uga soo gallo dadka, si wax badan loogu faa’iideeyo bulshadda ku dhaqan goboladda, haddii ay tahay hudheeladda wax laga cunayo, meelaha la seexanayo iyo arrimo kaleba. Culayskii meel keliya ku wada dhacayay wuu kala jabayaa imika. Kharashka imika ku baxayaana, wuxuu la mid yahay kii markii hore ku baxayay. Wax waliba way noo dhammaystiran yihiin, shuruucda, gar-sooreyaasha iyo dhinacyo kaleba.”.

Dhinaca kale, Wasiirka Ciyaaruhu , waxa uu mahadnaq baladhan u jeediyay madaxweynaha Somaliland Axmed Siilaanyo, Wasiirka maaliyadda, shaqaalaha iyo hawl-wadeenadda kale ee kala shaqaynaya ciyaaraha. Waxaanu yidhi “Waxaan ammaan balaadhan u dirayaa, madaxweynaha Somaliland Axmed Maxamed Siilaanyo, Wasiirka maaliyadda oo taageerro dhaqaale oo balaadhan noo geysatay. Waxa kale oo aan ammaan u dirayaa madaxda iyo masuuliyiinta labadda gobol ee lagu qabanayo ciyaaraha. Waxa kale oo aan Bogaadinayaa shaqaalaha wasaaradda ciyaaraha, iyo gudidda ila shaqaynaysa. Shaqo wanaagsan ayaana noo socota.”

Sidoo kale Axmed Cabdi Kaahin, ayaa rejo-wanaagsan ka muujiyay in ciyaaruhu ay sidii la qorsheeyay ku dhamaan doonaan, marka laga reebo wixii xagga ALLE kaga yimaadda. Waxaanu yidhi “Waxaan aad ugu rejo weynahay in wax waliba ay sidii loogu tallo-gallay ku dhammaado, marka laga reebo wixii xagga Illaahay ka yimaada.”

Ugu dambayn Wasiirku waxa uu ka hadlay ciyaartoyga xulka gobolka Sanaag oo shil baabuur galay iyo xaaladda ciyaartoygii dhaawacu ka soo gaadhay shilkaasi. “Xulka gobolka Sanaag shil baabuur ayay maanta (shalay) markii ay soo socdeen ku dhacay, tababarihii kooxda ayaana ku dhaawacmay, xaaladiisu way fiican tahay, waanan ku booqday cusbitaalka. Badhasaabka gobolka iyo masuuliyiintii kale ee goboladda kale ka kala yimid ayaa u tegay. Meel fiican ayaa la dhigay, si fiican ayaana loo daaweeyay,” ayuu yidhi Axmed Cabdi Kaahin.

Comments

comments

Leave a Reply

This site uses Akismet to reduce spam. Learn how your comment data is processed.