Badhasaabkii U Horeeyay Ee Xijaab Xidhata Ingiriiska

0
Badhasaabkii U Horeeyay Ee Xijaab Xidhata Ingiriiska

Badhasaabkii U Horeeyay Ee Xijaab Xidhata Ingiriiska

Raaqiya Ismaaciil waxa 16-kii bishan May loo doortay inay noqoto badhasaabka degmada Islington ee Waqooyiga London. Gabadhan Soomaaliyadda ah ayaa siyaasadda ku jirtay in muddo ah, waxayna golaha maamulka London kamid ahayd tan iyo sanadkii 2012-kii.

“Ma jiro qof kugu marti galinaya inaad ka qeyb qaadato, balse waa inaad adiga isxilqaanto , waxaana lagaa rabaa inaad fahanto sida go’aannada loo sameeyo, goorta la sameeyo iyo cidda sameysa intaba”, ayey tidhi mar ay ka hadleysay khibradda maamulka.

Waxaa la aaminsan yahay in Raaqiya ay tahay haweeneydii ugu horreysay ee xijaab xidhata ee dalka Ingiriiska ka noqotay badhasaab ama guddoomiye degmo. Howlaheeda ayaa ku saabsan adeegyada shacabka, waxayna inta badan ka qeyb gashaa munaasabadaha dadweynaha, iyadoo u mataleysa golaha ay ka tirsan tahay.

“Waxay ila tahay tallaabadan ma aha mid aniga kaliya horumarkeyga ku saabsan, balse run ahaantii waa awood ay si gaar ah u heleen bulshooyinka laga tirada badan yahay ee ku dhex jira shacabka, sababtoo ah farriimaha aan ka helayo dadweynaha aad bay u faro badan yihiin,” ayay tidhi.

Raaqiya oo wax ku baratay gudaha UK waxay xilal ka soo qabatay iskuulkii ay wax ka dhiganeysay, iyadoo markii dambena u xuub siibatay dhinaca siyaasadda.

Wareysi ay BBC-da siisay ayey ku sheegtay in ay arrin aad u wanaagsan tahay in haweeney ka soo jeeda dadka laga tirada badan yahay ay siyaasadda qeyb ka noqoto.

“Waa muhiim in gabadh midabkeedu madow yahay ay ku jirto siyaasdda, sababta ay taasi muhiimka u tahayna waa in go’aannada la sameeyo intooda badan aan ku matalo nafteyda iyo dadka kale ee madowga ah ee laga tirada badan yahay”, ayey tidhi Raaqiya.

Soomaalida qurba joogta ah ayaa heerar kala duwan ka gaadhay siyaasadda waddamada reer galbeedka ee ay ku sugan yihiin. Sidoo kale haweenka Soomaaliyeed ee waddamadaas ku sugan ayaa si gaar ah saameyn weyn ku yeeshay siyaasadda.

Dalalka Mareykanka, UK iyo waddamo badan oo reer Yurub ah ayaa aqalladooda baarlamaanka iyo goleyaasha kale laga arkaa siyaasiyiin asal ahaan kasoo jeeda Soomaalida, halka kuwo kalena ay u xusul duubayaan inay ka mid noqdaan.

Sanadkii lasoo dhaafay, Ilhaan Cumar, oo ah gabadh kasoo jeeda Soomaaliya ayaa noqotay mid kamid ah labadii gabdhood ee ugu horreeyay ee Muslim ah oo ku biirtay aqalka Koongareeska Mareykanka.

BBCSomali

Comments

comments

Leave a Reply

This site uses Akismet to reduce spam. Learn how your comment data is processed.